La Direición del SOMA-FITAG vien siguiendo con fondu interés les posibidaes anunciaes pol Presidente del Gobiernu d’Asturies pa, pente medies d’una reforma del Estatutu d’Autonomía, llograr finalmente la oficialidá del asturianu y del eonaviegu.

Esi llogru representaría’l triunfu d’una llarga demanda p’algamar unos derechos sociales y constitucionales de los que yá esfruten comunidaes como Galicia, Valencia, Cataluña, Navarra o Baleares y que permiten a la so ciudadanía l’exerciciu de la llibertá nel emplegu de les respeutives llingües.

La co-oficialidá del asturianu (y del eonaniegu o “fala”, nel so territorio) fairía posible que les xeneraciones moces d’asturianos y asturianes se rellacionaren ente sí nun clima de convivencia y respuestu acordies cola práutica de la tolerancia intercultural que demanden les instituciones europees.

Pero ye que, amás, la oficialidá tiene otres implicaciones socio-económiques que nun se puen dexar de llau y que tomen como referencia’l desarrollu d’industries -y, darréu d’ello, la xeneración d’empléu d’alta cualificación-, n’ámbitos como les nueves teunoloxíes, los medios de comunicación, el turismu, la industria editorial y discográfica, etc. Los exemplos d’otres comunidaes autónomes y de rexones europees dan bona cuenta del resultáu de rellacionar la inversión na cultura propia y el desarrollu económicu nos sectores mentaos.

Dende’l SOMA-FITAG queremos apoyar los esfuerzos de los partíos parllamentarios que sienten Asturies y que valoren la so llingua y cultura pa que, escaeciéndose de la intolerancia y el dogmatismu de dalgunos, faigan posible que, finalmente, la Constitución Española, pueda facese plenamente efeutiva na nuesa comunidá nel planu cultural.